မျိုးစေ့ အခွံခွာခြင်းနှင့် မျိုးရွေးချယ်ခြင်း
မိမိစိုက်မည့် မြေဧရိယာအလိုက်၊ မျိုးစေ့လိုအပ်မှုနှင့် လုပ်အားရနိုင်မှုအပေါ် မူတည်၍ မျိုးတောင့်များကို မစိုက်မီ ( ၁- ၃) ရက်အတွင်း၌သာခွာပါ။ မစိုက်မီ စောစောခွာထားပါက ၊မှိုတက်ပြီး အပင်ပေါက်ညံ့ခြင်း၊ တစ်ဧက အပင်ဦးရေ မပြည့်မီခြင်းကြောင့် အထွက်ထိခိုက်နိုင်ပါသည်။လုံးပိန်လုံး ညှပ်များ ၊ မျိုးဆံကွဲများကို ဖယ်ရှားရန် ဆန်ကာချပါ။ ဆန်ကာပေါ်ရှိ အစေ့များအနက်မှ အောက်ပါအ စေ့များကို ဖယ်ရှားပါ။
- ကြီးလွန်းသော အစေ့များ (အစေ့ကြီးလွန်းလျှင် ၊ မြေကောင်းကြိုက်ခြင်း ၊ ရေငတ်ပါက အဆံ မတည်ခြင်း ၊ပင်ခြေပုပ်ရောဂါမှို (Aspergillusniger)မခံနိုင်ခြင်းတို့ဖြစ်တတ်သည်။
- အရောင်ပြောင်းနေသောအစေ့များ (မျိုးစေ့ ဆောင်မှိုပါရှိ၍ ၊အပင်ပေါက်နည်းခြင်း /လုံးဝမ ပေါက်ခြင်းကြောင့် တစ်ဧက အပင်ဦးရေ အပြည့်မရရှိနိုင်ပါ။
- အမြှေးပါးကွဲအက်နေသော အစေ့များ ၊ ပွန်းပဲ့နေသောအစေ့များ ၊ (မြေထဲချလျှင် မြေဆောင်မှိုများ အလွယ်တကူ ဝင်ရောက်ပြီး အပင်ပေါက် ညံ့နိုင်သည်။)
- မသေးလွန်း ၊မကြီးလွန်းသော အစေ့များကိုသာ မျိုးအဖြစ်ရွေးချယ်သင့်ပါသည်။
မျိုးစေ့ဆေးစီရင်ခြင်း
မျိုးစေ့များက ၊မြေထဲရှိအစိုဓာတ်ကို စုတ်ယူ၍ မျိုးညှောင့်မပေါက်မီနှင့် ၊ ပေါက်ပြီးစတွင် ၊မျိုးစေ့နှင့်အတူပါလာသည့် မျိုးစေ့ဆောင်မှိုများနှင့် ၊မြေကြီးထဲရှိ မြေဆောင်မှိုများသည် ၊လျင်မြန်စွာ ပေါက်ပွားကြီးထွားကာ တိုက်ခိုက်သဖြင့် အပင်လုံးဝမပေါက်ခြင်း ၊ သို့မဟုတ်ပေါက်ပြီးစ အပင်ငယ်များ သေခြင်းမှကာကွယ်ရန် မျိုးစေ့များကို မစိုက်မီ မှိုသတ်ဆေးစီရင်သင့်ပါသည်။
- မျိုးစေ့ ၁ ကီလိုဂရမ် (၆၂) ကျပ်သားရှိ အစေ့များကို ဇလုံ ၊ တောင်းတစ်ခုခုတွင် ထည့်ပါ။ ထမင်းရည် အေးအေးကို မျိုးစေ့အားလုံး စွတ်စိုရုံမျှထည့်၍ လက်ဖြင့်မွှေပေးပါ။
- ဟိုမိုင်း ၈၀ ဒဗလျုပီ (၃-၅) ဂရမ် (လဘက်စားဇွန်းတစ်ဝက်မှတစ်ဇွန်း) ထည့်၍ ၊လက်အိတ် စွတ်ထားသော လက်ဖြင့် သမအောင် ညင်သာစွာ လူးနယ်ပါ။(တုတ်ဖြင့်မွှေလျှင် ၊ အဆံပေါ်ရှိ အမြှေးပါးကွဲအက်နိုင်သဖြင့် တုတ်ဖြင့် မမွှေသင့်ပါ။
- အရိပ်ထဲတွင် ခြောက်သွေ့အောင် လေသလပ်ခံပါ။(စိုနေစဉ်မျိုးစေ့ချပါက မှိုသတ်ဆေးသည် အစေ့နှင့်အတူပါမှုနည်းပြီး လက်နှင့်ဇလုံတောင်းတွင် ကပ်ကျန်နေတတ်ပါသည်။
- မျိုးစေ့များခြောက်သွားလျှင် စိုက်ကြောင်းတစ်လျှောက် သတ်မှတ် အကွာအဝေး အတိုင်းချပြီး ခြေထောက်ဖြင့်ချက်ချင်းမြေဖုံးပေးပါ။ပြီးမှ ကြမ်းရိုက်ပါ။
- ဟိုမိုင်းသည် မျိုးစေ့များကို မှိုရောဂါမကျအောင် ကာကွယ်ပေးနိုင်သည့်အပြင် အပင်ငယ်အ တွင်း ပင်လုံးပြန့်အဖြစ် စိမ့်ဝင်ပြန့်နှံ့နိုင်သဖြင့် အပင်ငယ်များကိုပါ မှိုရောဂါမကျအောင်ကာ ကွယ်ပေးနိုင်သည်။ သီရမ် (Thiram)မှိုသတ်ဆေးပါဝင်သဖြင့် မျိုးစေ့နှင့်အပင်ငယ်များကို ကြွက်၊သမင်စသည်တို့ မစားအောင် ၊ နှင်ဆေး (repellant)အဖြစ်ပါ အကျိုးပြုနိုင်သည်။
- ဟိုမိုင်းအပြင်၊ကလိုရိုသာလိုနေးလ် (ဘန်ကိုနေးလ် ၇၅ ဒဗလျုပီ) သုံးလိုပါက မျိုးစေ့ (၁)ကီလို (၆၂) ကျပ်သားလျှင် ဆေး (၃-၄) ဂရမ်းနှုန်းဖြင့် လည်းကောင်း
- မင်ကိုဇက် သုံးလိုပါက မျိုးစေ့(၁)ကီလို (၆၂ ကျပ်သား)လျှင် ၊ ဆေး (၃)ဂရမ်နှုန်းဖြင့် လည်းကောင်း၊ အထက်ပါနည်းအတိုင်းမျိုးစေ့ ဆေးစီရင်နိုင်ပါသည်။
- သို့ရာတွင် ကလိုရိုသာလိုနေးလ် နှင့် မင်ကိုဇက်မှာ၊ ထိသေအာနိသင်သာ ရှိသဖြင့် အပင်ငယ်များအား ထိရောက်စွာ ကာကွယ်မှုမပေးနိုင်ပါ။
တန်ကြား၊ ပင်ကြား အကွာအဝေး
တစ်ဧကလျှင် မြေပဲအတောင့်တင်း (၁၀၀)နှင့် အထက် ထွက်ရန်၊ အဓိကလိုအပ်သော တစ်ဧကတွင် အပင်ဦးရေ တစ် သိန်းဝင်စေရန်၊ တန်းကြား ၁၅ လက်မနှင့် ပင်ကြား ၄ လက်မ ထားပါ။ တစ်ဧက အပင်တစ်သိန်းရှိ၍ တစ်ပင်လျှင် အစေ့အပြည့်ပါသည့် နှစ်ဆစ်တောင့် တစ်တောင့်ပါလျှင်၊ အတောင့် ၆တင်းထွက်နိုင်ပါသည်။ ထို့ကြောင့် တစ်ပင်လျှင် နှစ်ဆစ်တောင့် ၁၇ တောင့်ပါပါက တစ်ဧက တင်း၁၀၀ ထွက်ရှိနိုင်ပါသည်။
မျိုးစေ့အတိမ်အနက်
သန်စွမ်းသော အပင်ပေါက်များ ရရှိရန်လည်းကောင်း၊
ဘေးကိုင်း ၄ကိုင်းပါသော ပီပြင်သည့် အပင်များကို ရရှိရန် လည်းကောင်း၊
ကြားထွန်ဝင်ခြင်း၊ အပင်ပြုစုခြင်းကြောင့် မြေပိပြီး ဘေးကိုင်းများ မထိခိုက်စေရန် လည်းကောင်း၊ မျိုးစေ့ များကို ၁ လက်မခွဲ၊ ၂ လက်မအနက်သာ ချသင့်ပါသည်။
၎င်းထက်နက်နက်ချပါက အပင်ငယ်မြေပေါ်ပေါ်ရန် အစေ့အရွယ်အောက်ပိုင်း ( Hypocotyl) ရှည်လာသဖြင့် အပင် ငယ်သန်စွမ်းမှု မရှိတော့ပါ။ ဘေးကိုင်း ၄ကိုင်း ထွက်ရန်လည်း မဖြစ်နိုင်တော့ပါ။ မြေပဲတောင့် များသည် ဘေးကိုင်း များ၌သာဖြစ်ပေါ်သဖြင့်၊ ဘောကိုင်းနည်းလေ၊ အတောင့်နည်းလေ၊ အထွက်နည်းလေ၊ ဖြစ်ပါသည်။ အစိုဓာတ် မိစေရန်နှင့် မျိုးစေ့ အတိမ်အနက်ညီညီရစေရန် စိုက်ထယ်ရေးကောင်းအောင် မြေပြုပြင်ပြီးမှသာ စိုက်ပျိုးသင့်ပါသည်။
စိုက်ပျိုးသုတ ပစ္စယ (Pissaya Info)
The post မြေပဲမျိုးရွေးချယ်ခြင်းနှင့် မြေပဲစိုက်ပျိုးခြင်း appeared first on Myanmar Farmers' Portal.